Larsap General (Dr) Vijay Kumar Singh chuan National Integration Tour-a kal turte a lawmpui thu sawiin, tour kaltlanga thil zir turte chuan zirna mai bakah an thanlen zelna kawngah hriatna leh thiamna pein a pui dawn a ni, a ti a. Hmanni maia hawn thar Sairang Railway Station atanga tour an tan tur chu lawmawm tiin, nakin lawkah Rel-in chhim lam District-te a la thlen thuai dawn thu a sawi a. India rama khawpui pawimawh tak tak an tlawh tur chu lawmawm a tih thu sawiin, India ram hnam ziarang leh nunphung danglam nasat zia an hmuh dawn avangin zirlaite chu midangte hnam ziarang leh nunphungte chika hriat thiam tum turin a chah a ni.

Larsap chuan India ram hnam ziarang leh nunphung danglam nasa em em chu kan chakna leh inpumkhatna atana pawimawh tak a nih tih sawiin, zirlaite chu an kalna apiangah hriat belh duh an neihte inthlahrung hauh lova hotute zawt zel turin a chah a. National Integration Tour chuan inunauna leh inpumkhatna a hrin chhuah ngei a beisei thu sawiin, an thil hmuh leh hriatte an theihnghilh mai loh nan diary-ahte chhinchhiaha nakin zel atana hman tangkai tum turin a fuih a ni.

Tour kal turte thlahna inkhawm Raj Bhavan Circular Lawn-a neihah hian Officer In-Charge, National Integration Tour hnen atangin tour neih dan tur tlangpui ngaihthlak a ni a. Larsap-in tour kal turte NIT Cap a khumtir theuh a. He hunah hian Brig Puspendar Sorayan, DIG, HQ, 23 Sector Assam Rifles leh Officer dangte an tel a ni.

National Integration Tour (NIT) 2025 a kalte hian Mizoram chhuahsanin Guwahati an pan a. An cham chhung hian Guwahati, Amritsar leh Delhi-a hmunhma pawimawh leh hriat hlawh tak takte bakah Sipai hmun pawimawh thenkhatte an tlawh dawn a. He tour kaltlang hian zirlaite'n India ram an hriat chian lehzual theih nan India culture, nunphung, thiamna leh ei leh in hrang hrangte hmelhriat tir tum a ni a; an tawnhriatte chuan zirna lamah pawh a puih ngei beisei a ni. Ruahman dan chuan November ni 29, 2025 ah tour zo felin Mizoramah an rawn let leh dawn a ni.